東亞運尋晚開幕，維港雖然有二十幾萬人逼爆兩岸睇煙花，但運動場上依然不改觀眾冷清嘅場面，民間靜英英，醫學界議員梁家騮慨嘆，東亞運同港人嘅生活落差極大，港府雄心勃勃，但係市民個個長工時捱騾仔，放工返到屋企都夜晚八、九點，仲邊有閒情逸致睇東亞運吖，尤其做咗人老公嘅，有時間唔陪老婆而去睇東亞運？唔怕被人扭甩耳仔咩！
另一位建制派議員克勤仔亦話明知無時間睇東亞運，費事早早預訂晒啲飛，生人霸死地喎。「孫公」孫明揚太太鍾小芬就話，孫公一向鍾意睇踢足球賽事，但公務繁忙，好難抽到時間捧東亞運場，寧願夜晚留喺屋企睇英超好過，孫公會為東亞運籃球賽頒獎，到時話唔定順便做埋觀眾就真。而馬會主席陳祖澤亦都話，唔會入場睇東亞運。建制中人都唔撐場，東亞運反應冷淡真係意料中事啦，睇嚟港府同東亞運公司真係要檢討一下推廣策略至得嘞。