有「牛仔褲大王」之稱嘅旭日集團董事長楊釗係虔誠佛教徒，佢哋夫婦早前出席咗當代佛門泰斗、深圳弘法寺前方丈本煥長老上月七日一百零三歲壽誕嘅活動。原來楊釗與本煥長老相交逾十年，楊釗信佛之後心境平靜，每天打坐一小時十五分鐘，佢仲向我哋透露咁多年經商信佛嘅心路歷程。
佢話，自己二十幾歲仔已衣食無憂，七五年時身家有五至六百萬元，足以買港島半山或跑馬地二十五至三十個單位，有樓、有車、有遊艇，名成利就，但始終唔係太開心，仲四處問人：「人生應該追求乜嘢？」直到八一年佢睇咗兩本佛家嘅書先開始看透「因果報應」。
楊釗八一年身家已經增至四億元，佢將其中二億元投資地產，前後賺咗十七億元。九八年四月，佢再以十二億四千萬元投得北京道一號地皮，一度畀人話買貴咗，但係依家最少值四十億元。舊年金融海嘯佢有冇損手？楊釗話，舊年八月八日北京奧運開幕當日，佢已下令投資部將手頭過十億藍籌股全數沽出，「一股不留」，更加無掂雷曼債券，所以佢咁樣評價自己：「曾經有人話無買債券嘅人係發神經，我咪係囉，有個神經佬叫『楊釗』！」