06/12/2009

播放本新聞相關短片

政情:林鄭頭痕閂水喉

本文重點
廣深港高速鐵路嘅撥款文件上個禮拜過咗立法會工務小組,只等本月十八日過埋立會財委會就可以開工,不過菜園村嘅超豪賠償先例,對嚟緊有大把基建工程嘅發展局卻係一個反面教材,事關下家開大水喉係有特權,掌管超級大局嘅發展局局長林鄭月娥只能閂水喉慳啲使,難怪佢嘅常秘周達明尋日急急搶閘為新界東北發展計劃消毒,話明菜園村嘅賠償係特殊案例,即係只此一次、下不為例。呢招神又係你、鬼又係你嘅賠償政策,一定搞到發展局第日收地阻滯多多,民怨更大,林鄭做硬夾心人,唔頭痛就難啦!

今次高鐵嘅超豪撥款事前引起好多批評,但特區政府早幾年耽誤高鐵項目,家吓惟有用錢來買番時間,等高鐵工程趕得及喺今年年底展開招標等前期工作,所以運輸及房屋局局長鄭汝樺先可開大水喉,以超豪價錢向菜園村村民收地,只係可一不可再。

一時一樣大細超

發展局常任秘書長周達明尋日出席一個電台節目時,就講到明高鐵屬於全港策略性項目,港府向菜園村嘅賠償只係一個特殊案例,唔可以應用喺新發展區上。新界東北發展計劃只有構思,周達明已經咁早表態,目的都係唔想古洞、粉嶺等地嘅村民諗大咗,不過,政府一時一樣、令人感覺大細超,遲啲被收地嘅村民肯定好勞氣啦。

好打得嘅林鄭月娥近排大力宣傳政府嘅基建大計,接受公務員通訊訪問時都話政府要打開自○六年起本港陷入基建低谷嘅局面,以後每年基建開支會由○七至○八年嘅二百億元提升至本財政年度嘅四百億元,佢愈講愈興奮,仲前瞻吓二十年後呢啲基建大計全部完成嘅景象:「我相信香港在二十年後仍繼續繁榮,那時,香港是一個充滿生氣的城市。」睇嚟,好打得嘅林鄭已經預咗要同被收地嘅村民拗手瓜。