小白觀點：香港司法賞惡罰善

飲醉酒害死六個人，小市民以為死者家屬跪過煲呔曾，斷估今次呢個司機唔判終身，至少都坐幾十碌啩，點知法官又係高高舉起，輕輕放低，只係判佢坐六年，幾乎一條命坐一年，唉，人命原來真係咁賤！

香港嘅司法制度不嬲都係「賞惡罰善」，你要睇吓不良傳媒將新聞淫賤化，喺香港橫行咁耐，幾乎係無王管，即使當局裝模作樣扮玩懲罰，只係罰雞碎咁多就算，打埋落成本，真係除笨有精抵到爛。卒之養到淫賤傳媒肥頭肥腦，開枝散葉禍延台灣，好彩，人哋嘅政府好有吉士，唔使多講，見一鑊罰一鑊，當堂打殘大淫獸，所以話呢，治混蛋只可以用重典，別無他法！

網址：www.sunsiupak.blogspot.com

網友觀點......

火爆號

有無搞錯！殺咗六條命判咁輕，當事人坐完出來一定又照飲酒揸車，仲想見到幾多無辜人受害呀。

cc

依家梗係一臉悔意啦，佢出番嚟又可以考牌，過多幾年，人性本質又係咁出番嚟。

堵旺

我有大把朋友釘咗牌之後，都喊咁口話唔會再飛車，拎番牌之後，仲片得快過之前。

地下法官

我哋啲納稅人唔介意畀錢，養呢班不負責任嘅司機坐成世。

阿豪觀點：公唔公道睇你點睇

落馬洲車禍肇事司機醉酒駕車導致六人死亡，法庭判佢六項誤殺罪全部成立，有死者家屬怒斥咁樣即係「殺一個人判一年，好唔公道」，各位又點睇？咁樣判法對其他醉貓司機有無阻嚇作用？

公唔公道，睇吓你點計嘅啫。好似舊年就有一個經典案例，有個男人虐殺懷孕赤麂，結果都係被判入獄半年。可能大家會話，人點同動物比呀？都係嗰句，睇吓你點睇啦，赤麂有兩隻眼，人有兩隻眼，豬亦都有兩隻眼，咁即係話人即係等同赤麂，赤麂亦都等同豬啦！仲有唔好唔記得，赤麂係受保護動物，一屍兩命，即係一條命三個月。人唔係受保護動物，窮人更加要幾多有幾多，一條命一年好重o架啦！

網址：www.lukchiho.blogspot.com

網友觀點......

光頭胎

梗係唔夠阻嚇力啦，六條人命判六年！

Johnson Lo

不嬲都話要尋仇殺人的話，應該選擇搵架車撞o架啦……

匿名

其實判幾多都有人話輕o架啦，如果係咁，不如好似大陸咁搞個公審大會算罷啦！

你講晒

大佬呀，咁法律都唔可以太違反常識o架。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。

明日主題

交警片車