嗱，東亞運開幕前已經鬧出國際大笑話，就係即場唔賣飛，呢樣嘢真係夠晒創意，國際賽事從來未有咁嘅安排。如果賽事場場逼爆，當然無話可說，但事實係大部分初賽入座率得三成左右，而且當中好多係免費入場嘅學生，明明仲有好多門票賣唔出，當局硬係唔肯即場售票，卒之搞到有飛冇人睇、有人冇飛睇。

最慘係有外國遊客專程嚟香港觀戰，搞到要望門興嘆。有遊客直言，香港係國際城市，唔賣即場飛實在難以想像，仲話寧願去行街，都唔會去睇東亞運。政府話東亞運可以提升香港形象，照依家咁睇，係降低形象至真。

搞出咁嘅國際笑話後，高官先至補鑊，聲稱「因應公眾需要」而安排即場賣飛。其實細路仔都識啦，售票服務要方便觀眾，當局連咁簡單嘅道理都唔識，仲好意思扮尊重民意，唔怕笑甩人哋棚牙。

實際上，東亞運蝦碌嘢點止售票混亂，簡直多到數唔清。遠嘅唔講，就講日前舉行桌球預賽，高手出場，吸引唔少捧場客，奇怪嘅係，前面嘉賓席根本冇人坐，空空如也，觀眾只可以喺後座「高高在上」睇比賽，又冇大屏幕，根本乜都睇唔到，好多觀眾呻笨，話早知喺屋企睇電視轉播仲好。更離譜嘅係，有觀眾踢爆，連一歲嬰兒都要買大人飛，當局安排幾咁混亂，由此可見一斑。

莫講話觀眾意見多多，就連熱情幫忙嘅義工都谷到一肚氣。有大學生投訴當值時間太長，你估官員點講呀，佢哋話喎，做義工要有犧牲精神。九唔搭八！

有犧牲精神嘅義工一樣畀人玩。多間非牟利機構員工被招募做義工，但係等嚟等去都冇下文，直到開幕前夕先接到通知，原來已被叮出局，空歡喜一場唔算，仲浪費咗假期。

谷氣嘅唔止觀眾同義工，有運動員組成「香港體育苦主大聯盟」，計劃喺東亞運期間發動連串示威。佢哋批評政府監管不力，縱容部分體育機構黑箱作業，令優秀運動員被迫出局。話時話，呢鑊嘢隨時又演變成國際醜聞。

其他地方主辦大型國際賽事，喺籌備階段難免有甩漏，但係通常會逐漸走上正軌，好似香港東亞運咁一直到開幕仲醜聞不斷，烏龍百出，確實少見。班高官攞世界一流嘅人工，但辦事效率就世界九流，實在令人難以接受。

搞笑嘅係，當局不自量力，仲話要申辦亞運會。唔好玩啦，憑佢哋嘅組織能力，小小東亞運都搞到唔湯唔水，主辦亞運會咪盞鬧出更多笑話。人貴有自知之明吖，叮！