小白觀點：做臥底 驚過鬼！

「FOXY天王」兩下散手，又喺網上摷到寶，港島總區反黑以及重案組調查報告任睇唔嬲，仲話要搞校園驗毒添。容乜易朝早驗完，夜晚啲資料已經唱通街，你知啦，依家啲細路面皮特別唔襟激，郁啲走去自殺，唔知呢條人命係咪應該入特警成數至係呢？

不過警隊機密資料唾手可得，小市民冇晒信心，最驚嘅應該係啲新紮臥底師兄師姐，如果有日黑幫大佬好認真咁同佢講：「唔好扮嘢嘞，哦，我上網睇過，知道你係臥底！」嘩，真係唔驚就假咯，未聽完即刻冷汗直標，拔足而逃。大佬i晒頭，只不過喺Facebook睇到佢寫食評頭頭是道，懷疑佢係米芝蓮美食臥底啫，使唔使驚成咁呀又？

網友觀點...X）...：做臥底 驚過鬼！

[　joker　]

咁重要嘅資料都唔加密，隨便抄出抄入，私隱掉去晒邊。

[　金田一　]

係咪有無間道特登流出來㗎，捉二五仔就啱。

[　立　信　]

警察將市民資料亂咁放已經唔係第一次啦，今次仲搞到上網，市民以後真係有權唔畀資料差人喎，容乜易通街知呀。

[　Ron　]

嘩，偷人底褲畀差人捉到，第二日咪可能周街知，犯案者小心。

阿豪觀點：FOXY代言人—特警成

警方機密文件又透過FOXY透露。都唔明點解啲差大哥咁唔小心嘅，之前都試過幾劑玩FOXY玩出禍㗎啦，點解仲唔咁醒水㗎？睇嚟特警成都要食定多啲喉糖，費事道歉道到聲都沙。

今次事件凸顯警方嘅無能而治，但係對於FOXY嚟講就係一個難得嘅宣傳機會嘞。大家諗吓啦，警察話晒都係一個講究保密嘅機構，竟可透過佢哋搵到警方機密文件，咁不如索性搵特警成做代言人啦。建議個廣告可以倣效某名牌生髮中心咁樣，鏡頭影住特警成接電話：「喂，警務處。」市民：「警局呀，我想報失呀。」特警成：「你打錯啦，要搵嘢安裝FOXY咪得囉，使乜勞師動眾呀？」

網友觀點...X）...

[　無間校長　]

係咪臥底中學畢業生不甘警方洩密爆校名，加入警隊反洩密報仇？

[　客　迭　]

啲所謂「機密」，都係對阿公嚟講就機密，都唔關個警員自己事，梗係闊佬懶理啦！

[　jam紙兒　]

今次特警成有冇出嚟道歉呀？成日道歉，不如拍定啲罐頭片段啦……

[　文禮陸　]

私隱專員公署係咪時候出嚟做吓嘢呢？

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。

明日主題

醉駕殺人又輕判