白鴿黨嘅甘乃威舊年仲係議會新丁，遠遠未達議會風頭躉級數，但今年就憑好感及解僱事件成焦點，「甘乃威」三個字更成為Google互聯網搜尋器○九年政治人物排行榜第二位，連人氣旺盛嘅美國總統奧巴馬，同慳電膽益親家嘅煲呔曾都要借歪。不過，隨住女事主王麗珠發函，甘威隨時煩到頭都爆，邊顧得人氣呀！
○九年好多大事發生，甘威嘅好感事件能夠引起網民咁重視，可算政壇一奇。Google方面估計係因為前立法會議員譚香文（Mandy）在電台節目證實甘乃威曾向女助理「示愛」，令事件鬧得愈來愈激烈，除咗甘威搏命被點擊外，Mandy都順理成章打入排行榜第九位，揮低好多政壇巨匠；連女主角兼前助理王麗珠亦成為搜尋榜第十位，Google話事件引發網民搜尋女事主嘅背景資料大起底，可見網民對好感事件分外好奇。
前日，王麗珠打破沉默，發表聲明踢爆甘乃威同白鴿黨大話連篇，件事勢必再起風波，白鴿黨主席何俊仁尋日已反責王麗珠一面指控、一面拒絕現身立會聆訊，佢哋咁樣你來我往，睇怕網絡熱潮想降溫都難啦。