本文重點
諾貝爾物理學獎幾日之後就舉行頒獎儀式，「光纖之父」高錕嘅太太黃美芸或要作丈夫嘅代理人。佢早前返咗香港出席連場活動，尋日又代夫出席喺銅鑼灣中央圖書館舉行嘅「暢談高錕教授與光纖科技」講座，黃美芸大爆同老公嘅生活情趣。
佢話夫妻間頂撞難免嗌吓交，仲笑騎騎話自己係台山人，老公係上海人，但舌劍唇槍時最流利仲係講英文，好在高錕出名係開心果，同太太頂嘴只會一句起兩句止。黃美芸又讚老公有病在身仍然幫得手，會主動幫手倒垃圾、整理花園同修理家具。
高妻今赴瑞典
高錕抱病在身，舟車勞頓始終唔適合，黃美芸惟有變成高錕「代言人」，佢今日就會起程去瑞典出席連串諾貝爾獎活動，包括下周二喺斯德哥爾摩舉行嘅「諾貝爾物理學獎講座」，屆時仲會上台發言。咁到底高錕本月十日會唔會喺瑞典舉行嘅諾貝爾頒獎禮上亮相呢？黃美芸話自己都唔敢寫包單喎。