香港歷史性舉辦東亞運動會，未開賽已揭發特區政府及籌辦機構亂晒龍，開幕禮前夕，新聞處先鬧大笑話，尋日凌晨零時零九分，新聞處代東亞運公司公布賽果，劈頭先講香港足球隊以四比一戰勝南韓隊，稿尾又話南韓隊以四比一贏咗港隊，前後矛盾。官方賽果都亂咁報，唔怪得東亞運日日甩轆啦！
點知笑料繼續嚟，新聞處介紹港隊戰勝南韓隊時，又聲大大話「韓國隊為其中一隊亞洲隊伍參與六月舉行的世界盃」，好似想為四比一贏咗南韓隊嘅港隊臉上貼金，趁機唱好東亞運咁，不過，知情口痕友忍唔住踢爆新聞處同東亞運公司出醜。
事關世界盃外圍賽啱啱踢完，歐洲四大聯賽要開快車，好多南韓球星都喺歐洲搵食，加埋韓職亦如火如荼展開，呢個時候，球會點肯派一線球星嚟香港參加畀面派對呢？查實南韓足總派出一隊乙組仔組成嘅國家隊嚟香港招呼東亞運，但有人就不知就裏或者有心誤導，以為呢支就係南韓參加世界盃嘅正選國家隊，卒之因為支A貨南韓隊搞出美麗嘅誤會。
香港隊贏波，港人梗係開心，但都要認清對手實力先得。報錯賽果一段時間後，新聞處都發覺有問題更正咗，但呢次笑話真係可一不可再啦！