東亞運籌辦過程爆出好多甩漏，估唔到嘅係連重頭戲、「中國之夜」表演晚宴都搞層壓式推銷，要由本港六大商會及青年組織捱義氣買枱，據講，聽晚喺會展舉行嘅頭炮文化活動「中國之夜」，筵開一百席，贊助商級別有黃金贊助到鑽石贊助，由商會及組織認頭後，再分銷畀會員，最平一張餐券係二千三百多蚊，最貴嘅係四千元，貴到無倫，呢次真係商界大出血，夾錢撐東亞運囉。
文化之夜係東亞運動會傳統項目，包括中國之夜、蒙古之夜、關島之夜、澳門之夜等，今年有六十席屬每席二萬八千元（黃金贊助）、二十席三萬八千元（白金贊助）及二十席四萬八千元（鑽石贊助），表演節目卻係天津嘅舞劇院及雜技團表演，廣州西關小姐時裝表演，而本港就出少林武僧耍功夫，節目都幾令人Ｏ嘴。不過，晚宴個嘉賓名單寫明「中央政府官員」，究竟買枱嘅會因為近水樓台接觸中央領導人開心，定係感覺啞仔食黃連就唔知喇。
商界被人揼心口外，六個副局長都被下令今日放少日假，傍晚去到銅鑼灣、西九龍、觀塘、將軍澳、青衣及屯門，出席各商場嘅迎東亞運開幕活動谷吓氣氛，班副局長連自己嘅人氣都谷唔起，難道谷得起東亞運？