本文重點
自從泛民拋出五區總辭嘅戲碼後，政圈日日都有好戲睇，唔係踢爆黑手、就係火併嗌交，今日公文袋舉行會員大會表決總辭又係一齣好戲，事關我哋收到消息，話今日嘅表決案只有大框框，即大會通過授權執委會見機行事，並冇講明一定會參加總辭。社民連方面，則由主席黃毓民下個禮拜喺立法會動議要求市民支持五區總辭，希望炒㷫件事，不過，建制派當個動議冇到，泛民嘅街工梁耀忠就修訂刪除五區總辭嘅字眼，公文袋嘅梁家傑亦刪除二○一二年落實雙普選嘅字眼。泛民鬼打鬼，真係有排未完！
社民連難向白鴿黨施壓
總辭是非未停，原本旗幟鮮明要辭職嘅公民黨近日立場都開始含糊，繼押後派發刊物宣布兩議員會參加辭職後，今日嘅會員大會表決亦繼續猶抱琵琶半遮面，據講，佢哋今日下晝嘅大會議題只係一個虛無縹緲嘅授權案，會員只需表決授權執委會決定參加總辭否。如果屬實，呢個表決案都可算騎呢，美其名係全體大會通過，不過，公民黨執委隨時可以因應有冇獲得泛民支持而縮沙，即係保留做彈弓手嘅權利。
公文袋閃縮，社民連就撐到底，嚟緊呢個禮拜三，立法會就會辯論黃毓民個議案。
一直話唔支持總辭嘅梁耀忠就提咗修訂，劈頭就刪咗「五區總辭、全民公決」呢啲字眼。梁家傑都有個修訂，但就話五區總辭係「變相公投」，亦冇再要求二○一二雙普選，只係要求有真普選同取消功能界別。
佢哋兩個修訂等於剝咗原動議兩顆最利嘅牙，社民連原本想藉呢個辯論向白鴿黨施壓，依家睇嚟，未必有呢個效果，不過，議案辯論當日，勢逼到各大陣營又要表態，想走出繼續互轟、你批我鬧嘅局面都好難。