屯門安定邨尋日又發生高空墮物事件，一名七歲女童返學途中畀高處墮下嘅鐵錘擊中頭部，當場血流披面。話口未完，天水圍尋晚又有一把刀從高處墮下，好彩冇人受傷。房屋署話，會盡快喺安定邨安裝「天眼」，仲會成立特別職務隊加強巡查喎。

嗱嗱嗱，又係亡羊補牢、賊過興兵呢招。唔爆大鑊，班懶官都唔會做嘢。房署自己都證實，安定邨過去一年已經發生過兩單高空墮物事故，不過就冇人受傷，亦搵唔到肇事者。

叮！「天眼」唔係乜高科技產品，其他屋邨裝咗都證明起到阻嚇作用。既然安定邨發生過同類事件，房署早就應該對症下藥裝「天眼」同加強巡邏啦。等到有細路女頭破血流至知補鑊，拿拿臨話要做嘢，遲唔遲啲呀？

唉，無妄之災從天而降，避無可避，家陣香港真係愈來愈冇安全感。呢嗱，呢個禮拜一，青衣有部廿五吋電視機由高處墮下，好彩當時現場冇人，如果畀咁大舊嘢砸中個頭，一定凶多吉少；之前一日，大角咀有部落緊貨嘅凍櫃車十分鐘內接連畀三個玻璃樽「空襲」；淨係九龍區，上個禮拜五就發生四單「空襲」，墮下物件包括地拖棍、螺絲帽、垃圾桶同膠片，五花八門乜都有。

講真，病從口入，小心啲食嘢就冇事；禍從口出，至多講少幾句；禍從天降，點避吖？第日市民出街除咗要帶手機，「遇襲」嗰陣可以即時報警之外，唔通仲要戴埋鋼盔，以防「爆樽」？真係愈諗愈得人驚。

如果政府唔想市民出門成日眈天望地，一步一驚心嘅，咪再後知後覺，鋪鋪都亡羊補牢，唔該爽啲手，盡快喺高危地點裝晒「天眼」，見一單重罰一單，屢教不改嘅，加重刑罰。最緊要實啲，千祈咪關人個關，到時又係走漏眼，浪費警力同資源，咁就天冇眼咯。

話時話，裝「天眼」始終治標唔治本，就算全香港每個角落都裝晒，亦冇可能徹底解決問題。如果唔加強公民教育，唔培養市民嘅公德心，對威脅市民安全嘅隱患繼續掉以輕心，香港只會愈來愈唔安全。

旺角鏹水彈襲擊元兇仲逍遙法外，高空墮物畸士幾乎日日見報，煲呔曾成日話要「創就業」，「十大基建」、「六大產業」呢啲吹水嘢有排未見影，不如優先發展「鋼盔製造」，市民一人一頂，出門唔使頭岳岳驚餐死仲實際。叮！