太陽今季憑「小球戰術」重現霸氣，不過紐約人教練迪安東尼，尋日倒戈太陽，就用行動證明咩先叫做「正宗快打旋風」，帶領紐約人主場以126:99大炒太陽，令對方今季得分首次未能過百！

金塊熱火鬥快攻可追大

眾所周知，太陽前幾年成績咁好，全靠迪安東尼嘅「小球戰術」，以快速反擊搞掂對手，可惜08年雙方因太陽喺季後賽首圈不敵馬刺而分手。太陽今季喺根特利執教下，重現「小球」威力，喺聯盟領導群雄，不過紐約人主帥迪安東尼尋日倒戈，就話畀對方聽咩先叫真正「快打旋風」，半場已經取得今季新高71分，第3節完更加突破100分，最終以27分大勝太陽，中止5連敗，同時結束對方今季場場得分過百紀錄。紐約人以加連拿利（上圖右）表現最好，全場射入6個3分波，獨得27分同10個籃板。

放大圖片

放大圖片

講起「快打旋風」，金塊都好犀利，尋日主場以135:107大炒勇士，聽朝佢哋繼續喺主場對住熱火，難得大細中位數只係205.5分，梗係要繼續追大盤啦！