本文重點
金融海嘯之後，香港人多咗幫襯平民化嘅食店。大家樂集團執行主席陳裕光（Michael）更一度因為集團業績亮麗而備受矚目。尋日嶺南大學頒授榮譽院士畀六位社會傑出人士，Michael榜上有名，其他仲有渣打大班洪丕正、西九文化管理局諮詢會委員黃英琦、香港擇善基金會執行主席陳樂怡同兩位中華總商會永遠榮譽會長何世柱、胡經昌。
仔女鍾意自己創業
Michael全家總動員撐場，包括一對仔女浩弘（Robert）同浩寧（Candie）。不過，佢對仔女都冇入大家樂做嘢，反而鍾意自己創業。身為香港飲食界巨子，Michael有乜飲食心得呢？佢話自己「平時食得好隨便」，一個禮拜至少有三日幫襯番大家樂，仲趁機賣廣告話大家樂招牌咖喱牛腩同焗豬扒飯係佢「飛佛」添。