本文重點
公開場合撞衫，可能係名人圈最恐懼嘅事之一。做咗立法會議員嘅前高官葉劉淑儀曾經話，寧願帶兩套衫出街都唔想同人撞衫。不過，尋日佢喺立法會就同運輸及房屋局局長鄭汝樺（Eva）不約而同着咗件Armani灰色外套，只係個心口針唔一樣。葉劉都要講笑解窘，話同Eva做咗孖生姊妹。
開會時間太早累事？
葉劉話件Armani外套係上年喺專門店買嘅，價錢唔超過一萬蚊，另外佢仲買埋同系列嘅心口襟花，大約二千蚊左右。Eva就話工作實在太忙，冇乜時間買衫，通常都係去中環一間百貨公司揀啱就算。佢仲透露，葉劉如果知道佢會去立法會，好多時都會問吓佢着咩色嘅衫，免得出現撞衫嘅尷尬場面。不過，尋日工務小組八點半開會咁早，可能葉劉問唔切Eva先會撞衫。
撞衫事件發生後，葉劉透露屋企有唔少Armani外套，雖然佢都唔想買嚟買去都係嗰啲牌子，但好多時都冇乜嘢好揀，所以佢以前做官嗰陣就成日着Armani，近期佢就多咗Paul Smith同Dolce & Gabbana呢兩個新歡。