尋日工務小組開會十五分鐘後，泛民陣營以收到市民投訴為由，質疑何鍾泰擔任中國建築嘅非執董，可能有利益衝突，結果要休會十五分鐘。何鍾泰詢問立法會法律顧問意見後，認為件事係獨立事件，可由佢自己處理。富貴黨嘅劉健儀緊接發言，認為件事雖然唔牽涉直接嘅金錢利益，但為保議會公正，何鍾泰應該避席先恰當。呢個時候，何鍾泰都話為咗議會形象決定退出會議，既唔做主持，亦唔會表決，按照立會慣例，公文袋嘅袋巾傑頂上做主席。

發叔表明冇利益衝突

工務小組嘅主席一向唔投票，何鍾泰避席對建制陣營嚟講毫無損失，反而因為佢唔玩，搞到反對派再少一票。捉蟲之後，泛民陣營又質疑行會成員兼新界王劉皇發有利益衝突，因為佢喺新界有好多地，但發叔表明佢啲地同高鐵工程無關，呢個解釋獲得新主席接受，令發叔唔使避席。

搞咗一輪，工務小組押後今日先表決。口痕友話，泛民今次玩嘢玩出禍，原本以為以幾個議員利益衝突殺政府一個措手不及，點知反而搬石頭砸自己嘅腳，造就何鍾泰避席，幫高鐵撥款案鋪好條大直路，睇嚟泛民先係高鐵成功啟動嘅功臣！