又係世事如棋局局新，就喺輾輾轉轉尋尋覓覓、疑似山窮水盡之際，忽然柳暗花明。見到篇報道後，莊瑞熙失散咗十年嘅親生哥哥忽然出現，結果醫院一驗，發現佢嘅骨髓同莊瑞熙完全脗合，可以進行骨髓移植救番個細佬！好咯好咯，大團圓結局咯，飲得杯落咯……

咪住，大家唔好咁高興住，事關兜兜轉轉峰迴路轉，有骨髓原來唔代表有得移植喎。原來，全港只得瑪麗醫院可以提供骨髓移植，而且只得十張隔離病床，每年只可以為一百二十個病人進行手術。個醫生攞出張密密麻麻嘅輪候名單，發現有接近一百個病人等緊，排得嚟，可能要到下年。

叮！醫病救人分秒必爭，尤其係血癌病人抵抗力弱，拖多一日就多一分感染病菌致死嘅機會，而全香港竟然得嗰十張病床，要病人等足一年咁耐，究竟班醫療庸官諗乜嘅呢？唔怪得全民健康動力主席勞永樂大鬧：「政府真係算死草，淨係識得用五百億元利誘市民買醫療保險，唔肯將啲錢用喺急須改善嘅醫療服務！」

如果香港係貧窮地區，病床不足係因為無錢，大家無嘢好講。問題係，本港醫管局一直肥到漏油，單計○八至○九年度嘅政府撥款就超過三百億元，但使喺病人身上嘅錢就愈嚟愈少，醫療事故就愈嚟愈多。太一叮思疑，醫管局已經改咗名做「醫菅局」，全稱「醫療庸官草菅人命局」。

而更加匪夷所思嘅係，喺咁嘅情況下，班醫療庸官仲喺度日日呻窮，食物及衞生局局長周一嶽仲不時攞個醫療融資出嚟嚇鬼。嗱，勞醫生就講得啱嘞，政府攞五百億元出嚟「推動醫療融資」，無非係想氹人落疊，醫管局連救死扶傷嘅本分都未做好，講咩融資都係嘥氣！

其實，周一嶽不時向市民伸手要錢，講話改善醫療係假，想要繼續疊床架屋、養肥更多醫療高層至真。嗱嗱嗱，醫管局個臃腫架構仲未改革，佢老兄又成立咗一個三百幾人嘅「電子健康記錄統籌處」，話要推廣電子病歷喎。

太一叮好想問問周一嶽，家陣做個骨髓移植都等成一年，隨時等到啲病人命都無埋，仲要個病歷嚟做乜呢？

世事如棋局局新，醫局害人是永恒。兜兜轉轉尋尋覓覓，又到你個周一鑊上嚟受叮喇！企定定啦周一鑊，快快刪減高層冗員，速速增撥前線資源，唔係三兩日又整單醫療醜聞，轉個頭又上嚟受叮，你煩唔煩嘅呢？叮！