有份去祝捷會嘅有七、八十人，包括副會長林大輝、施榮懷、倪錦輝同會董吳永嘉等。大輝話成班人食到十二點先捨得走，席間當然唔少得食翅，仲有螺片同臘味飯等，都幾啱依家寒冷嘅天氣，再加埋十支茅台、二十幾支紅酒，所以唔少人都飲到high晒！

酒量喺高手之列

大家咁高興，唔知身為主人家嘅黃友嘉有冇被「隊」到醉倒當場呢？大輝話，黃友嘉嘅酒量唔係咁差，即使唔係頂尖高手，都必定喺高手之列，所以前晚冇飲醉。大輝仲牙擦擦咁話講酒膽，佢就叻過黃友嘉，但講酒量就未必喇！