據聞政府最擔心嘅，係泛民拖到明年二月中、即政改諮詢期結束後先至辭職，咁根據補選應該喺正式辭職約四個月後舉行嘅慣例，五區補選就要喺「六四」同「七一」呢兩個泛民大日子中間舉行，對政府同建制派都相當不利，即係林公公都想避開呢兩個敏感日子啦！

依家泛民計劃喺下月中辭職，就合晒政府心意，只要政府喺二月底發表嘅預算案加碼派糖、收買人心，咁喺三月中舉行補選就fit晒，就算預算案反應欠佳，政府以籌備需時為由，押後到四月份先投票，泛民亦冇借口提出挑戰。

之不過，人算不如天算，如果泛民最後改變策略，押後辭職日期同換人參選，林公公就有排頭痕，可見呢場攻防戰仲存在好多變數，唔係政府諗得咁簡單。