賭王喺○一年起帶頭發起「賀禮捐公益」，結果一呼百應，每年均為公益金帶嚟可觀善款，今年佢抱恙未出得院，但善心仍在，尋日二太藍瓊纓同子女包括超鳳、超蕸等人，喺公司信德中心將一百五十萬元巨額支票交畀公益金，一於將快樂帶畀有需要嘅人，貫徹賭王為善最樂嘅做人宗旨。

大會預備咗壽包同賭王賀壽，二太仲即場食番個添！至於畀賭王讚為「密底算盤」嘅兒子，臨走前不忘攞番八個壽包返去孝敬爸爸，佢話爸爸身體唔錯，可以食到壽包喎。

何家千金就話賭王一向「取之社會、用之社會」，睇見子女慷慨解囊，就係最好嘅生日禮物。雖然掏腰包做咗善事，但賭王份禮物絕冇縮水，二太女兒超鳳尋日朝拎住個名牌Hermes紙袋去醫院探病，三太女兒超雲就由友人拎住個連卡佛大紙袋抵埗，四太女兒超盈更親手自製大畫框，貼上自己同爸爸嘅溫馨照片，再以英文寫上祝福字句，夠晒心思。

賭王嘅太座都唔輸蝕，三太攞住個公文袋，唔知有乜乾坤；四太就連續兩次用手喺胸口做出心形動作，話送個心畀賭王喎。