雷曼小組尋日又舉行閉門會議，小組主席何鍾泰喺會後話，證監會行政總裁韋奕禮經已交出證監會嘅檢討報告全文，以及證監會、金管局同政府之間就迷債回購協議嘅書信。但係份回購協議同埋證監會調查十六間分銷銀行嘅結果，韋總仍然死抱唔放，仲要求喺小組閉門會議先處理上述四份文件。

老實講，小組當然想快啲完成同迷債相關嘅調查啦，但偏偏韋總就唔肯放份結果出來，搞到佢哋好似拖住條尾咁，尋日嘅閉門會議亦傾唔到啲乜，索性喺禮拜五再舉行閉門會議，再傳召韋總作供，兼且去照肺，為唔肯披露呢份文件解畫，希望可以撬開韋總個夾萬，攞啲料出嚟。須知道長痛不如短痛，與其繼續喺度扭計，韋總不如都係合作啲啦！

高秉忠毛遂自薦

正當韋總有料都唔肯爆嘅時候，曾經喺證監會擔任非上市投資產品高級經理嘅高秉忠就自投羅網，毛遂自薦要到雷曼小組出席聆訊，個款仲好似係有料想爆咁。但何鍾泰話小組當然好歡迎任何有助調查迷債事件嘅人上去作供，但傾過之後都係覺得，高秉忠應該單聲到底佢有乜嘢料想爆先，至少喺唔違反佢同證監會嘅保密協議下，講啲基本資料嚟聽吓，免得小組畀人濫用嘛！

其實，雷曼事件已擾攘咗一年有多，但雷曼小組嘅調查工作仍然以龜速進行，無非係官員不時扭擰所致，尤其下個月就輪到財政司司長鬍鬚曾到立法會受審，如果將來真係要傳召埋十六間銀行代表，而個個都好似韋總咁多多聲氣嘅話，係咁拖吓拖吓仲得了？分分鐘查到今屆立法會收工都未查完，難怪小組要出手做嘢啦！