話說有一位二十四歲嘅鄭小姐去泰國旅行返嚟，懷疑染咗眼病，兩眼又紅又腫，喺機場call白車直接去瑪嘉烈醫院急症室。醫生診斷係結膜炎，轉介明愛醫院眼科。眼病可大可小，唔及時醫分分鐘會盲。事不宜遲，瑪嘉烈嘅醫生喺封轉介信上標明兩個Urgent，即係緊急緊急。

點知急驚風遇上慢郎中，鄭小姐第二日帶轉介信去明愛醫院眼科求診，職員一睇就話佢唔係住呢區，要佢去亞皆老街香港眼科醫院輪診。病人打電話向瑪嘉烈醫院查詢，對方話醫生搞錯咗，但係又唔幫手協調。

咁就大鑊嘞，鄭小姐兩隻眼已經痛到睜唔開，仲狂飆眼淚水，睇嘢影像重疊，視力恐怕已受損。佢好聲好氣求明愛員工幫忙，但對方闊佬懶理，更激氣嘅係，病人頭暈眼花企唔穩，想借張輪椅坐吓都唔得。

明愛醫院實在豈有此理，醫者父母心，醫護人員見到病人受苦，理應第一時間出手相救。冇錯，唔排除瑪嘉烈醫院轉介錯咗地方，但係錯嘅係院方，病人係無責任嘅，又辛苦成咁，作為醫護人員，點可以袖手旁觀吖？叮！

病人百般無奈，惟有致電本報求助。本報第一時間派記者去現場，哈哈，有嘢睇嘞，睇乜嘢？睇變臉騷咯。幾分鐘前仲係黑口黑面嘅醫院員工，家陣不知幾好笑口；先頭鄭小姐想借張輪椅坐吓，對方理都唔理，但記者到咗唔夠五分鐘，輪椅就主動送到。最奇嘅係，有個醫院女主管忽然現身，一直陪住個病人入診治室。唉，閣下要學變臉，使乜去四川拜師吖，嚟明愛醫院學咪得囉。

對呢種忽然愛心，鄭小姐直言話：「之前我痛到睇唔到嘢，都仲要等施捨，一有記者嚟就做騷，醫管局真係好離譜！」

咁醫管局又點講吖，九龍西醫院聯網雖承認事件對病人造成不便，表示歉意，但又話急症室有既定指引，會按病人住址分區轉介，而病者經明愛眼科醫生評估為非緊急個案，無即時危及視力，當值護士已盡量為佢安排診治咁話。乜嘢叫做死雞撐飯蓋？嗱，有辦睇喇。

俗語有話，相同嘅錯誤唔可以犯兩次。以前太一叮硬係諗唔明，點解明愛醫院會一次又一次犯上拒救病人嘅錯誤呢？家陣終於明白晒，因為佢哋有醫管局嘅指引做擋箭牌吖嘛。

明愛，顧名思義應該為市民帶來光明同愛，但係依家既冇愛心又冇光明，仲成日靠害病人，咁不如改個名，叫做靠害醫院罷啦。叮！