大輝仲講笑咁話，本來真係諗住企喺馬場門口等「極奇妙」作戰完畢先入場，點知都係忍唔住，唔知係咪因為咁，「極奇妙」衝刺一刻竟然輸咗個馬鼻，激到佢紮紮跳。其實計計數，佢都有二十五萬元獎金落袋，足夠買架靚車做生日禮物。

咁去邊度慶祝生日呀？大輝話寧願返屋企同媽媽、太太食飯，事關工人煮咗佢最愛嘅苦瓜排骨黃豆湯喎！

肥仔張掛住東莞禾花雀

富貴黨副主席「肥仔張」張宇人都有入場，講起天時凍有乜好食，佢話掛住東莞嘅燒禾花雀，仲繪影繪聲咁話放啲膶腸入隻雀入面一齊燒仲好味。