政改諮詢方案只係將○五年版稍為優化，泛民主派唔肯收貨，正喺兩個首席推銷員政務司司長唐唐同政制及內地事務局局長林公公，諗爆頭點樣扭轉乾坤之際，竟然有人夾硬要做兼職推銷員。
工聯會嘅立法會議員ＫＫ黃國健嘅地區辦事處尋日開幕，勞工及福利局局長張建宗去致辭，但發言內容怪怪哋，無端端重提上個月嘅施政報告，仲針住KK一向重視嘅安老同最低工資嚟講，話政府已經做咗唔少嘢，又大讚KK幫得手，差啲捧到上天。讚得咁行有乜嘢目的呢？幾分鐘後終於水落石出。
張建宗臨尾忽然提起政改方案，話希望社會各界用開放包容嘅態度嚟討論政改問題，咁先可以令香港嘅民主向前邁進一步，儼如林公公早前一輪嘅電台宣傳。最後KK送咗個「勤」字嘅書法作品畀張建宗，表揚佢勤力硬銷。諗深一層，工聯會早就表態支持政改方案，睇嚟今次張建宗咁落力都係嘥料。