本文重點
有「小超人」之稱嘅長實董事總經理兼副主席李澤鉅，日前喺長江集團中心七十樓貴賓室同三十名香港大學學生零距離接觸交流。據與會者透露，席間小超坦誠分享事業路上嘅經驗，指自己都曾經遭遇挫折，勸勉學生只要吸取經驗，虛心學習，就能迎接面前挑戰。
經濟動力穿針引線
港大生之所以有機會同小超交流個幾鐘，要多謝經濟動力，因為呢個係經濟動力同港大合辦嘅「Meet the Entrepreneurs」系列第三炮。小超作風一向低調，所以定喺長江集團中心貴賓室舉行。
長實旗下生意龐大，小超平日勁忙都肯抽空同學生見面，經濟動力都算大面子，而尋日經濟動力「3L」之中，梁劉柔芬同梁君彥都唔見人，只有林健鋒做主持。林健鋒話好多港大生同小超接觸過後，都讚小超係一個熱愛家庭、關心下屬同關顧社會嘅商界領袖。