本文重點
民政事務總署四百幾個聯絡主任（LO）喺月初大呻工作有加冇減，齊齊按章工作；點知轉個頭班行政主任（EO）又嘈，話揸旗嘅署長陳甘美華護短，搞到佢哋無端端做多勁多嘢，陳太本身已經夠騰雞，呢次仲腹背受敵，肯定有得震冇得瞓！
努力騷親民一面
好彩班LO已經決定今日起照常工作，騰雞美華理應可以鬆口氣，但佢尋日一聽到「LO」兩個字，即刻又騰雞起上嚟，話過去幾個禮拜有同同事溝通，了解佢哋嘅需要，仲話已得到班EO嘅支持，可以幫吓手分擔工作，佢仲係咁強調同啲同事有「緊密」聯繫，努力反映自己親民一面。
其實騰雞美華可以喺三個禮拜內搞掂工潮，大可扮晒超人出嚟認叻；弊就弊在太過刻意，成部人肉錄音機咁猛播帶，淨係講溝通都講咗四五次，講到人哋按章工作好似好唔合情理咁，搞到成件事over晒，仲有可能適得其反添！
官場中唔少高官都係人肉錄音機，政制及內地事務局局長林瑞麟更係表表者，相信騰雞美華都係有樣學樣啫！
尋日現場相當嘈吵，騰雞美華專登哄埋記者嘅錄音筆前面繼續發表「溝通論」，驚死大家聽唔到咁。