泛民為五區總辭爭拗白熱化，最後發展成點仍有好大變數，但建制派陣營內最近已經浮露一張迎戰虛擬名單，好似建仔嘅蔡素玉出戰港島、鍾港武出戰九龍西、工聯會「票后」陳婉嫻出戰九龍東、富貴黨田北俊同胞弟田北辰分別出戰新界東、西咁，幾乎全部都係舊人新用，其中田少同嫻姐更加係由港英立法局時代做起，有資格攞老人牌。

飲恨新界東嘅田少，尋日幾乎講到出口，話有意喺總辭補選落場玩埋一份。佢話自己年紀有番咁上下，二○一二年立法會選舉就未必有興趣嘞，但依家富貴黨三位議員嘅議會工作咁忙，黨都應該研究吓競逐補選，搵多啲人入議會幫手，可以考慮嘅人選，有佢落新東啦，周梁淑怡再戰新西，同埋田二少再戰九西。聽田少咁講，睇嚟真係十五十六，唔選唔舒服喎！不過，親中陣營傳田二少其實想落新西多啲囉，可以為二○一二年轉區鋪路嘛。

工聯會冇諗補選問題

另一位建制派舊電池嫻姐，尋日都被傳媒捉住問佢係咪會參加總辭補選，佢嘅態度同田少簡直雲泥之別。嫻姐話工聯會完全冇諗補選問題，而佢亦好鍾意依家嘅工作，潛台詞係，一度係九東票后嘅佢，戰意冇田少咁濃烈喎，可能佢都係十五十六，但就係未揸定主意嗰隻。

有工聯會消息話，嫻姐難得退下立法會火線休養身體，現時睇佢的確冇乜意欲重出江湖，如果嫻姐堅決唔玩，工聯會極大機會喺五區都唔派人出選，做番「轎夫」為其他建制派參選者抬轎算數。不過，當然啦，如果陣營認定非由嫻姐披甲出征不可，嫻姐會點決定？未到最後一刻都唔會知o架！