小白觀點

暗啞抵環保救地球

聯合國兒童基金會得閒冇事做，做咗個環保意識調查，仲特登搵香港學童嚟開刀，一口氣數出幾宗罪，例如發現好多學生唔熄電腦，最離譜嘅係，好多竟然經常沖二十分鐘花灑浴，於是一口咬定香港細路仔嘅環保意識好唔掂。

唉，呢啲咁嘅調查，根本完全冇顧特區區情，學生哥長開電腦，晚晚有十套八套戲要BT，唔使浪費咁多光碟同包裝，查實係為環保出一分力咋。

仲有呀，佢哋長開花灑浴唔係浪費，主要係為咗掩飾某種正常青少年嘅正常行為，晚晚慳番十張八張紙巾，救番一個熱帶雨林，又唔使阿媽成日洗床單，慳水又慳電！如果全世界嘅小朋友都向香港學習，三○一二都未到世界末日啦。

網址：www.sunsiupak.blogspot.com

網友觀點

海薇：大嘅唔好就教壞細，父母冇做好榜樣，細路又點會知環保係幾咁緊要吖。

家俊：學校老師都冇好好教導學生環保意識，啲G仔邊知自己一直浪費資源？照樣燈長開、紙亂用。

jose：成個社會環保意識都不足㗎啦，淨係睇教科書成日改版幾咁唔環保就知啦，怪得細路仔咩？

波兒：睇見啲細路打機打通頂，唔環保之餘又損害身體，應該燒晒啲遊戲機！

阿豪觀點

太老實大個點做官

聯合國兒童基金會香港委員會調查發現，本港學童環保意識有待提高。

香港學生環唔環保我就唔知，但肯定太過老實喇！如果豪伯我係受訪學生哥，我一定會話：「有冇搞錯，淋花灑咁浪費？我都係用洗地用剩嘅水沖涼咋！」

咁樣答法，衰就係衰啲，但係你諗吓啦，高官講親環保都係呃人嘅，好似話慳電膽咁啦，明明唔夠LED燈咁環保，又有水銀污染問題，但政府就死係要推個乜鬼現金券計劃；仲有之前徵收膠袋稅，又唔肯專款專用推廣環保，堅持將收益撥入庫房，到頭來咪又係用喺公務員加薪！

所以話啫，後生仔及早培養對環保嘅「正確態度」，大個至有機會做高官回饋社會㗎！

網址：www.lukchiho.blogspot.com

網友觀點

路中拾遺：其實沖涼唔超過10分鐘又真係有啲難度嘅，不過由得部電腦就咁開住就真係有啲過分喇。

步gen雲：電腦唔係有screen saver㗎咩？唔用時都會轉做待用狀態啦。

sue_1988：同意，有時行開行埋10零20分鐘，唔通閂咗電腦去咩，到時再重開咪仲嘥電！

尖子：人哋都係好心提醒吓話地球資源有限啫，你哋良心覺得冇問題咯，咪繼續浪費地球資源囉！