想不到「蝦碌」情景亦移師至議事堂。繼煲呔曾教「英文單數動詞應加S」後，立會主席忽地又疑似「正音大師」上身，指出克勤仔把「褫」奪讀成「遞」奪，正當的讀音係「雌」。咦！泛民議員笑得特別開心，於是主席又發功：何俊仁議員剛才讀「飭令」時，讀成「勒」令，應該讀「飾」令先啱！估唔到讀數學出身嘅主席，文學修養都有番咁上下。不過，本報「政情」又指出：主席「正音大師」上身，卻依然錯！據字典，「褫」字應讀「始」才正確。

如今首長議員放着正經事唔去討論，卻去搞英文文法和寫正字讀正音，令人笑爆嘴。呢啲咁學術嘅嘢，留番畀學術界去玩，何必要議員字正腔圓？真係捨本逐末、捨正途而弗由。

立會原來係提高中英文水平的看台，如今啲學生、高考生連「安徒生發明電燈」都寫得出，隔多三五年，相信佢哋夠膽死話「煲呔曾發明慳電膽而譽滿全球」；再隔多十年八載，煲呔曾分分鐘與「光纖之父」高錕齊名！

高考生除了通識唔掂（皆因平時沒有閱讀習慣），中英文亦唔掂，筆者建議佢哋多啲睇立會直播，除了寫正字讀正音學英文文法外，又可偷師「亂噏」創新詞，幾正！