叮，私營骨灰龕不嬲都無王管，好多龕堂涉嫌違規經營，地政總署一直隻眼開隻眼閉，直至最近事情搞大咗，多咗人投訴，先至係咁意做吓嘢，遲唔遲啲吖。更搞笑嘅係，地政總署話就話已向違規經營者發信警告，但所有行動都係黑箱作業，神神秘秘、鬼鬼祟祟，市民一無所知。

咁就玩謝班孝子賢孫嘞，係人都知道，政府提供嘅骨灰龕位少得可憐，市民惟有幫襯私營骨灰龕堂，每個龕位少則萬幾蚊，多則幾十萬蚊，仲要漏夜排長龍等候。買咗龕位，將先人骨灰安放好，以為盡咗仔女責任啦，點知分分鐘中招，唔好彩買咗問題龕位，第日可能被清拆，損失金錢事小，先人骨灰冇地方安放事大。

更令人激氣嘅係，有啲骨灰龕涉嫌違規經營，當局一早就接到投訴，亦發咗警告信畀經營者，但係遲遲都冇採取行動，又唔向市民公布，令不知內情嘅市民繼續排隊買龕位。市民要求地政總署公布問題骨灰龕名單，署方就帶市民遊花園，話冇可能巡查所有私人土地用途，仲話業權人有責任確保土地使用符合規定。

咁即係點呀？咪就係卸膊囉！本來地政總署嘅職責就係監管業權人，確保土地使用符合地契規定，如果個個業權人都自覺遵守，仲要地政總署嚟做乜嘢？不如摺埋佢啦。

地政總署仲煞有介事咁提醒市民，購買骨灰龕位之前應該要求經營者提供資料，確保骨灰龕係合法經營咁話。嘥氣啦，如果經營者唔合法，又點會自己踢爆自己吖？莫講話經營者，就算係政府部門都唔肯向市民提供資料啦。呢嗱，有位廖小姐就中過招嘞，佢想搵個合法骨灰龕堂買龕位，打咗四次電話向政府部門查詢，但係幾個部門將佢當波咁踢，始終冇答到問題。廖小姐惟有自嘆倒楣：「呢個政府咁官僚，小市民仲可以點？」

講得冇錯，就係因為政府官僚，成件事先至會搞成咁。地政總署長期唔監管，令違規經營嘅骨灰龕遍地開花，無數市民中招，最慘係依家都唔知邊間係合法，邊間係違規，搞到人心惶惶。其實，向市民提供資料及指引，以免有更多人矇查查中招，唔係很困難嘅事啫，地政總署署長譚贛蘭，你唔係咁都做唔到吖嘛？

唉，「死無葬身之地」本來係一句狠毒嘅咒語，點知香港唔止死無葬身之地，連放骨灰之地都搵唔到，你話香港人幾咁可悲呀，叮！