小白觀點：生為樓奴死無定所

依家樓市好景，陰宅都唔執輸，市道一樣係咁暢旺，唔係講笑，如果以呎價計，隨時仲貴過豪宅添呀。奇就奇在，政府一直以嚟對陽間樓市唔多理，醫生律師呻買唔起山頂樓咩？咪搬去冇雷公咁遠囉，之但係對陰宅就唔同嘞，失驚無神忽然叫停出售龕位。

喂！咁樣干預陰間樓市，有違「大市場，小政府」管治原則喎，而且隨時搞到先人迫遷。做香港人真慘，生前一世人做樓奴，雖然間樓細到伸唔直對腳，但總算擋到風雨吖，勢估唔到真正兩腳一伸之時，竟然連蝸居嘅龕位都冇埋，話唔定遲早有日禮賓府前擺滿龕位靜坐示威，搞到連先人都抗議，你話呢個特區政府仲有乜運行吖？

網友觀點...X）...

[　雄爺　]

嘩，忽然叫停，政府又冇位畀出嚟，市民去邊度搵位拜祭先人呀？

[　偉信　]

幾百萬買咗個位嗰啲真係凍過水，政府話停就停，唔會賠個位畀你㗎。

[　無畏講　]

咁多私營位，做咗咁耐，依家至話人違規，當初又批畀人，政府做嘢有冇搞錯，最後玩起用血汗錢買位嘅市民。

[　Rock　]

你估市民想買貴位嘅咩，係政府唔整多啲合法龕位之嘛，一係就排九年都未有，依家咁多私營位都係政府造成㗎！

網址：www.sunsiupak.blogspot.com

阿豪觀點：難得私人市場幫拖

香港唔單止好多人上唔到樓，連陰宅一樣供不應求。政府咁多年嚟都冇出手增加公共龕位，最近突然叫停一啲私人龕位，話佢哋業務違反地契規定喎……嘩！咁樣之前「安居」嘅先人容乜易變另類難民㗎？

今次政府真係捉蟲，大家不妨諗吓，公營骨灰龕起到慢吞吞，依家難得有私人市場幫你分擔，又冇先人上街抗議自己係「冇殼蝸牛」，咁梗係悶聲發大財，繼續縮骨闊佬懶理㗎啦！不過呢單嘢都唔係冇得掹，記得早前牛池灣有間無牌車仔麵檔，被揭發過去九年被檢控近百次，仍然屹立不倒，地政總署大可援引呢個先例，得閒罰吓人錢，又可充實庫房，又唔會畀先人家屬嘈，一石二鳥啦！

網友觀點...X）...

[　赤柬風暴　]

有冇搞錯，政府自己唔起多啲龕位不特止，又唔畀人放喺寺廟，咁究竟先人嘅骨灰擺喺邊？

[　勤力卜　]

市民一齊將骨灰倒晒落海，同鄧小平撈亂骨頭，咁先有條件搵港府算帳！

[　蛇仔明　]

大把人生前做冇殼蝸牛，死後連個龕位都冇，好淒涼。

[　匿名　]

啲人大拿拿使幾萬蚊買龕位畀先人，依家突然又話唔可以用，咁叫佢哋將啲骨灰擺喺邊？啲錢係咪政府賠？

網址：www.lukchiho.blogspot.com