男拔萃書院尋晚舉行創校一百四十周年晚宴，政壇眾男拔萃舊生返母校撐場，唔怪得現任校董會主席「肥仔張」張宇人話，如果籌唔到五百萬元就會好失望啦。
由舊生變身校董會主席嘅肥仔張，全晚打住條紅藍斜紋校呔示人，佢話呢條呔由做仔打到做外公，好有感情，如果第時個外孫都讀到男拔萃，咁就最正嘞！
兩個仔讀緊小拔萃嘅香港青聯主席陳仲尼同太太前歌手區海倫（圖），喺眾多競投禮品中，對「任總飯局」嘅十二個名額情有獨鍾，但係投幾多錢好呢？陳仲尼計咗條方程式，以任志剛擔任金融管理局總裁時年薪九百萬元計，除開三百六十五日，再除八小時工作，飯局兩個鐘時間，大約五千蚊，任總陪食飯，畀雙倍價錢，一萬三千八百八十八蚊，OK啦！
