建制派嘅立法會議員本來約好本月二十七號召開第三次「武林大會」，當時盛傳政府有意喺二十五號推出政改諮詢，點知政府失驚無神變陣，提早喺今個禮拜三出招，即刻玩起飯局搞手建仔，要拿拿臨call人改期，而飯局嘅目的，就不言而喻啦。
議員個個都係大忙人，檔期唔係話改就可以改，於是尋晚七點喺中環上海總會餐飯，一地紙飛機，富貴黨同工聯會都冇人到；「發叔」劉皇發七點九到，八點離開趕下場；匯賢智庫葉劉淑儀去完全國政協委員廖正亮嘅喪禮至喺七點半趕到，夾埋十七人，一半建制派議員都冇。建制派飯盒會氣勢不繼，講到尾，都係煲呔曾累街坊。