香港旅遊業四面受敵，新加坡環球影城同上海迪士尼殺到埋身，全球最細嘅香港迪士尼都要諗計救亡。樂園行政總裁金民豪尋日出席中大嘅講座後透露，同海洋公園老總苗樂文傾過，大家有意搵個合適時機合作，但內容就未決定。
唔係呀？眾所周知，迪士尼同海洋公園係競爭對手，算係死敵嚟，以往雙方經常隔空寸寸貢，樂園擴建，海洋公園都話要擴建仲要起酒店，擺明係搶客，正如早前海洋公園寧願搵「三碌拎」合作推出門票折扣優惠，都唔侵迪士尼玩，關係有幾好可想而知啦！金總咁講，係咪一廂情願咋？
金總明知樂園擴建等得嚟蚊都瞓，惟有叫員工一齊諗計自救，例如諗啲小遊戲同遊客玩吓咁，結果兩個禮拜內收集到四百幾條橋，推出咗個星級服務計劃，總好過乜都唔做。佢話令遊客覺得自己與別不同，有賓至如歸嘅感覺，至可以吸引回頭客喎。