一份集時尚、奢華、藝術、夢想生活於一身嘅超凡品味特刊—LUXE life（極尚生活）尋日正式誕生，由《東方日報》隨報附送，內容精彩絕倫，從豪宅、跑車、遊艇、珠寶、葡萄酒佳餚等每一個生活細節，帶領大家領略非一般嘅極尚生活。
《東方日報》尋日派出多名靚仔靚女Model，打扮成英國紳士同淑女，朝早八點開始，分別喺中環、銅鑼灣同尖沙咀等「上班貴族」同遊客嘅集中地派發「LUXE life」特刊，好評如潮，爭相索閱。咁啱喺中環娛樂行撞到金管局前總裁任志剛急步趕去赴約，但佢都接過特刊細閱，認真捧場！
轉頭又見到立法會議員李華明，睇到頭版介紹嘅豪宅，佢笑謂買唔起，但一揭到內頁介紹「星級酒王」Chateau Petrus Imperial，就當堂生猛晒，話紅酒啱佢多啲，佢記得年前有次議員聚餐，鄉議局主席劉皇發就帶過呢支酒王宴客。肥仔明仲好識貨咁話：「我都係鍾意八二年Lafite（Chateau Lafite Rothschild）多啲！」