時移勢易，金勞詹當日豪情壯語，今時今日會唔會縮沙呢？尋日喺立法會見到佢再舊事重提，佢強調唔會收番辭職言論，唔單止擺出一副冇有怕嘅樣，仲好大口氣咁話，只要建制派夠齊心，泛民出五個最多得三個可以返到立法會。

豪賭慣嘅金勞詹唔單止又再開盤，仲預計埋泛民嘅下場，即係起碼輸兩席，咁對泛民而言，就變咗雙輸，唔單止輸咗兩個議席，唔能夠全數返立法會，即係連變相公投都輸埋。

點解金勞詹對自己嘅預測咁有信心？唔難理解嘅，依家五區總辭只係社民連同公文袋玩，冇咗白鴿黨參與嘅話，形勢當然唔會比人強，尤其係社民連嘅陳偉業喺舊年立法會新界西選舉包尾入局，再補選的話危上加危。

再睇吓新界東嘅梁國雄同九龍西嘅黃毓民，雖然喺舊年選舉攞到一定嘅票數，但過去年幾喺立法會不時爆粗、肢體碰撞等都令佢哋失分，若補選以單議席單票制進行，佢哋要攞逾五成票再入局都好渺茫。

公文袋有私心谷陳淑莊

講到公文袋，九龍東袋巾傑攞嘅票比白鴿黨李華明更加少，若果未能成功過票，都好難撼得贏建制派嘅票后陳婉嫻。唯一較穩陣嘅係港島嘅陳淑莊，但有金勞詹落去搞局，佢都一身蟻。

其實，有白鴿黨中人都質疑公文袋今次去得咁盡係有私心嘅，有說袋巾傑係想透過今次補選，為兩年後再參加特首選舉造勢。而點解咁重要嘅戰役，港島區唔係由黨魁余若薇出戰？令人質疑公文袋嘅布局係希望透過今次補選，營造群星拱照陳淑莊成為票后，繼余若薇後再創另一個神話。

嗱！都話泛民內部各懷鬼胎㗎啦，呢次五區總辭咪又一例證囉！