咦，好似熟口熟面咁嘅？冇錯，呢個計劃並唔係乜嘢新鮮事物，政府五年前就提出過，但因為區議會同居民強力反對，卒之掟埋一邊。

個計劃聽起嚟都幾架勢，起一條一點七公里長嘅高架路，將沙田路、獅子山隧道公路、Ｔ3道路同即將全線通車嘅八號幹線接駁。政府話喎，高架路建成後可以紓緩沙田及馬鞍山嘅道路負荷。

如果個工程真係咁巴閉，市民點解又會反對嘅？講鬼咩，條高架路十層樓咁高，仲喺當地嘅大型屋苑附近穿過，第日一通車，由朝到晚沙塵滾滾不特止，仲嘈喧巴閉添，附近居民想瞓番個好覺都幾難。

話係咁講，但若果條高架路真係好似政府話齋，對紓緩交通有咁大作用，當地居民係咪應該犧牲小我，成全大我呀？政府講到明，如果唔起T4主幹路，大埔公路沙田段到咗二○一六年，交通擠塞就會更加嚴重。

之但係，事情並唔係政府所講嗰回事。因為八號幹線嘅流量根本冇原先預期咁大，設計流量係每日十二萬架次，但家陣只有二萬幾架次咁大把，五分一都唔夠，又點會咁容易大塞車呀？即使八號幹線全線通車，相信都唔可能大塞車啦！

講開又講啦，政府放流料都唔係第一次嘞，當年起西部通道，開頭話起好後每日車流量有八萬幾架次，點知家陣連零頭都未夠。

其實，如果真係冇咗T4就會咁大鑊，政府五年前打死都唔會將個計劃摺埋啦。嗰班高官視民意如浮雲，又點會因為市民反對吓就改變主意呀？只不過當時仲以為香港經濟係二十年來最好，唔使靠啲細眉細眼嘅工程催谷就業，咁咪假扮順應民意囉。

家陣就唔同嘞，呢個工程話大唔大，話細唔細，多少都可以提供一批就業職位，為政府粉飾櫥窗。發展局局長林鄭月娥等高官梗係要重推T4啦，話之你班居民點抗議啦。之不過拖咗五年，工程費已經由五億元升到十一億元。唉，早知今日，何必當初！叮！

一句講到尾，政府重推T4主幹路唔單止冇需要，仲會造成環境污染，玩謝沙田區六十萬居民。林鄭局長，千祈唔好霸王硬上弓，唔係實畀人哋叮爆你鎯鎯。