17/11/2009

播放本新聞相關短片

政情:屎彈橫飛

小白觀點:懷舊惡作劇露線索

空襲狂徒愈玩愈過分,出完鏹水彈,再有木梯兼五把刀等等,武器日新月異,仲以為有幾個粵語長片武林高手喺度We Run Run,一時失手跌晒啲「七旋斬」呀、「無定飛環」呀落嚟添。以警方嘅智力,相信幾難破到案。

不過日前有人仲掟埋「屎彈」,咁就唔同講法嘞,如果警方醒少少,幾乎可以鎖定兇徒係邊類型嘅人。小白老弟認為呢次肯定唔係細路仔所為,因為屎彈惡作劇咁懷舊,冇番咁上下年紀係唔識玩兼夾唔敢玩,好明顯應該係一個三、四十歲或以上嘅港仔,並曾居於廉租屋一樓或以上層數,有咗呢個咁重要嘅數據,警方可以收窄範圍,傳召包括煲呔曾在內嘅脗合疑人拷問,應該好快會水落石出。

網友觀點...X)...

[ 卜勤王 ]

我覺得班人唔止掉嘢落街,直情係掉埋個良心同公德心落街囉。

[ 高 達 ]

連鐵錘都掟落街,冇傷到人真係好彩,呢啲人完全冇公德可言,應該重罰!

[ 百寶小天使 ]

依家出街又驚高空擲物,又有淋鏹水嘅危機,真係邊度都唔使去~

[ tony_1983 ]

或者包到實一實,帶埋工業安全帽先出街……

網址:www.sunsiupak.blogspot.com

阿豪觀點:驗DNA真兇冇得匿

繼之前掟大鐵錘之後,日前竟然有人離譜到掟屎彈落街,睇怕就嚟要搞有獎遊戲競猜下次跌乜嘢落街咯。

有犯罪學家話,屎彈狂徒可能受近日連串高空擲物事件影響,加入湊熱鬧,心態如同參加嘉年華。如果真係咁就好咯,當局不妨宣布對所有高空擲物狂徒既往不咎,但條件就係將佢哋困晒入一幢荒廢嘅大廈,畀佢哋入去開「高空擲物嘉年華」,到時佢哋鍾意掟雪櫃又好、掟人都好,都可以盡情去做,至於後果,當然係貴客自理啦!

吖,講開又講,成日話高空擲物案難破,照計今次掟屎彈嘅疑犯,除非佢哋喺公廁收集「彈藥」,否則唔係應該可以驗到DNA嘅咩?

網友觀點...X)...

[ 阿 晞 ]

依家就真係愈嚟愈恐怖囉!之前就鏹水彈,依家仲有屎水彈,咁之後仲會有咩彈出現呢?

[ 美 妮 ]

啲人真係冇公德又壞心腸,掟乜落街都有,會死人㗎!

[ yoyo_99 ]

連屎彈都玩埋,唔通唔出街咩,見到屋邨都行遠啲。

[ 代數小王子 ]

都唔明啲人做咩咁鍾意掟嘢,大鐵錘賣到錢㗎……

網址:www.lukchiho.blogspot.com