立法會復會之後，首日就搞出單抬長毛出議會弄傷保安嘅事，立法會方面即刻檢討多項保安問題，仲透露舊年有位市民喺議事廳公眾席上揮刀自殘後，佢哋已計劃請多三個年輕力壯嘅保安，希望新人返工後可以加強保安陣營，點知尋日秘書長吳文華（Pauline）透露，佢哋畀人放飛機，雖然請咗三個，但兩人臨時甩底冇嚟報到。
Pauline講起件事都有啲無奈，又係嘅，喺家吓咁嘅經濟環境下，立法會保安算係一份薪高糧準、福利好兼夾工作環境高尚嘅好工，點知竟然出現三缺二場面，唔通早排保安員受傷件事嚇怕咗應徵者？Pauline話兩者喺時間上都幾脗合，但真正原因只有當事人知道。
經過今次挫敗後，佢要重新敲鑼打鼓請人，仲被迫將兩個空缺嘅聘用條件稍為提高，希望盡快吸納新血，事關家吓立法會保安嘅人手實在捉襟見肘。
今次請保安嘅經驗，對佢哋將來營運新大樓有一定幫助，事關新大樓地方大好多，估計要喺家吓嘅基礎上再請多二十幾名保安員，所以Pauline期望議員同示威者都斯文啲，令秘書處易啲請人，佢就冇咁頭痛嘞！