特區政府近排大肆宣傳慳電膽,仲因為慳電膽整張百元現金券出嚟搞到滿城風雨,最好笑嘅係,煲呔曾初上任時曾經大言不慚挑戰全體議員,話要同佢哋搞番個鬥慳電比賽,尋日立法會方面透露,佢哋嘅新大樓極大可能唔會用慳電膽,而係用LED燈。
如果落實嘅話,立法會實行前一步,既剝煲呔曾嘅牙,又唔賣環境局局長邱騰華嘅帳。不過,立法會慳到電費錢,都係因為要花大額公帑先買昂貴嘅LED燈,同議員慳電冇乜關係。
據介紹,立法會已經研究過LED燈,由於LED嘅產品不斷改進同跌價,最近仲有啲聲稱比LED更慳電嘅產品推出,所以佢哋都係要睇定啲再決定訂購邊款,務求做到最環保同節約公帑。