17/11/2009

播放本新聞相關短片

政情:煲呔曾賴死一錯再錯

美國總統奧巴馬尋日到咗上海訪問,同當地青年真情對話,表現大受好評;反觀煲呔曾去到新加坡訪問,就畀當地大學生當面奚落,問佢有冇犯過大錯,明顯明知故問暗踩香港,難為佢仲笑笑口咁話可能自己出任特首就係一生中嘅最大錯誤,都唔知讚佢誠實好定係鬧佢無恥好。煲呔曾明知自己不斷犯錯,民望跌至不受歡迎,都賴死唔肯辭職,先係佢一生最大嘅錯誤。

煲呔曾任內犯過幾多錯失?真係寫幾本書都寫唔晒,最新嘅就有施政報告漠視全港窮人、涉嫌借慳電膽現金券明益親家,以及發爛渣老屈傳媒惡意中傷自己等。尋日下晝佢去咗新加坡管理大學演講,台下就有人問佢一生有冇犯過大錯,佢居然笑笑口咁答:「有人話我出任特首,就係一生嘅最大錯誤!」

既然煲呔曾都知自己做特首係大錯,點解仲唔辭職呢?皆因佢心底裏其實仲係死撐自己冇錯,錯嘅只係其他人。

佢話明白大眾對領袖要求好高,有時甚至有唔合理要求,反對聲音往往蓋過支持聲音喎,即係又想賴人啦!佢又話做領袖要有四大要素,包括謙卑、忍耐、不屈不撓嘅精神同智慧,所以佢日日都會去教堂,變相承認自己四樣要素都欠缺,要祈求上主畀佢。最令人失望係佢話做領袖嘅路好漫長,暗示佢死都要做埋餘下任期,繼續錯落去。

煲呔曾去大學演講前,仲特別抽空去咗東亞銀行新加坡總部做開幕禮主禮嘉賓,明撐「曾朋友」東亞主席李國寶。連外訪都掛住益老友,呢個特首真係一錯再錯!