17/11/2009

播放本新聞相關短片

政情:李樂詩下月再征南極

理工大學尋日頒授大學院士榮銜畀八位傑出人士,除咗前保良局主席陳小寶外,仲有極地探險家李樂詩(Rebecca)同中移動董事長兼總裁王建宙等。據聞Rebecca因為探險時飲得太多唔乾淨嘅水,幾年前曾患上重病,不過家吓已經康復,佢仲決定再踏征途,嚟緊下個月就會率領一班政商界名人考察南極生態。

近年已經成為半個環保人嘅Rebecca,冇詳細透露考察內容,不過遲啲市民一定可以欣賞到佢嘅相同文章。

中移動老總同獲榮銜

中移動老總王建宙早幾年抽空喺理大讀EMBA課程,攞埋工商管理博士學位,尋日更獲母校頒發大學院士榮銜,王建宙好謙虛咁話獲頒榮銜唔係個人榮耀咁簡單,而係對中移動全體員工工作成果嘅肯定。

據聞唔少內地電訊公司嘅老總都跑嚟香港進修,現任中聯通董事長常小兵都喺理大修讀EMBA課程,同王建宙做師兄弟。