陳維安尋日下晝去到大埔區一間中學，出席區內學校推行校園驗毒嘅活動，仲親身示範過程。由於驗毒計劃係抽籤進行，陳維安第一步係扮成被抽中嘅學生，之後再向社工、護士講自己好清楚個計劃，願意去驗尿，然後喺社工帶領下去咗洗手間。過咗一陣，有社工攞住一個尿液樣本出嚟測試，冇耐仲宣布結果：「副局長，你係陰性，恭喜！」就係咁，陳維安做咗驗毒合格嘅人辦嘞。

學生對計劃仍有保留

扮完學生嘅陳維安事後話：「為咗計劃成功，我義無反顧（驗毒）！」佢仲話，驗尿呢啲嘢好平常，就算平時轉工做身體檢查都會有，佢仲講笑話自己過咗十八歲，所以唔使家長簽名，自己都可以決定驗唔驗尿。雖然佢瞓身做騷，但大埔區唔少學生都對即將展開嘅驗毒計劃依然好有保留，睇嚟，陳維安想推銷見效，恐怕要驗多幾次至得。

講開又講，佢呢次做驗毒人辦，名係為推介政策，實際都有另類效用，事關佢過去落區推銷計劃時，曾經畀學生當面寸佢：「你有冇驗過呀？」今次以後，佢可以大大聲講句：「我驗咗喇！」起碼以後唔使再畀人窒吖。