話說今個月起，衞生署給予持牌小販攤檔展示煙草廣告嘅豁免正式撤銷，但乜嘢叫做煙草廣告，連衞生署自己都搞唔清楚。法例規定，以明示或默示方式，又或者所用嘅詞句能夠誘使、建議或促使他人購買或吸用煙草產品，都會被定為煙草廣告，唔可以喺攤檔展示，違例者罰款五萬蚊。之不過，點樣算係「明示」或者「默示」，乜嘢叫做「誘使性字句」，控煙辦根本冇清晰指引。

煙草廣告定義唔清唔楚，攤販動輒得咎，無所適從。開頭都以為只係講平面廣告，點知新法例臨執行前，控煙辦發信畀攤販話，攤檔擺出有煙盒嘅透明膠箱，亦係煙草廣告。

咁就死得人多嘞，行勻港九新界，不知幾多報攤都將煙盒擺喺透明嘅膠箱裏面賣，攤販從來唔覺得咁樣會有事，因為衞生官員以前曾實牙實齒話，「展示貨物唔會構成廣告」。但家陣控煙辦又話展示貨物唔得，究竟邊個講嘅先至算數？

正如有攤販話齋，我哋光明正大，梗係要畀人知有咩牌子嘅煙賣啦，家陣擺啲煙出嚟都當係賣廣告，唔通要好似賣私煙咁，用紙皮箱或者尼龍袋收埋啲煙賣咩！控煙辦咁搞法直情係靠害。叮！

最離譜嘅係，攤販主動約見控煙辦，要求釐清煙草廣告嘅定義，點知控煙辦班官變咗縮頭烏龜，唔肯見人。攤販忍無可忍，寫信畀食物及衞生局局長周一嶽，要求政府喺未釐清法例之前擱置所有檢控行動，佢哋講到明，如果問題唔解決，唔排除會發起抗議行動，到時睇當局點樣收科。

其實，唔單止攤販對法例一頭霧水，連控煙辦前線執法人員都矇查查，當局事先又冇培訓，佢哋根本唔識判斷乜嘢係煙草廣告，只可以按簡單指示區分。如果分唔清，就用相機將有懷疑嘅個案影落嚟，攞返去畀上頭決定。嘩，咁都得？叫佢哋做差人就弊傢伙，唔通見到賊人老笠，都要影張相返去畀老頂判斷咩！

控煙本來係好事，冇人會反對，但係家陣畀衞生署控煙辦搞到一鑊泡，簡直係添煩添亂，咁搞法，唔止係矯枉過正，直情係擾民兼靠害。嗱，衞生署署長林秉恩你唔好再做縮頭烏龜啦，快快趣趣出嚟搞掂佢，如果唔係，全港攤販遲早搵你算帳。

講到尾，都係港府虛偽累事。佢哋口口聲聲為市民健康着想，既然係咁，點解禁食唔禁賣？咪就係唔捨得煙草稅咯，咪就係虛偽咯，叮！