小白觀點：攝影技巧有待改善

男女警員踩單車郊野外，真係羨煞旁人！經本報踢爆後，聽聞上司都覺得唔多妥，要話吓兩個下屬。

警隊向來黑箱作業，外人根本好難知道內情，不過小白老弟估計兩個警員第二日一返工會即刻畀人捉入去照肺，口震震講句「Morning Sir」之後，大蛇拍枱大鬧：「你哋兩隻嘢有冇搞錯！影埋啲咁嘅相！知唔知會影衰警隊㗎？」兩人驚到腳軟，大嗌一聲：「Sir！Yes！Sir！」大蛇語重心長咁講：「知就好嘞，唔該以後加番塊反光板，影『迷失回歸塔』嗰張最好攞Wide啲……嗱，呢度有本攝影入門書，快啲操好啲，唔係沙龍唔好Post上Facebook呀！免得公眾以為警隊影相技巧咁水皮！」

網友觀點......

點解你係咁

遲啲唔知會唔會有啲當緊更走去註冊結婚呢？

細b

有咩出奇呀，我睇過條片成班差佬着住制服當街玩求婚添啦！

無眼睇

依家啲警察質素咁差，巡邏都當玩，賊佬爆緊屋時，警佬就拍緊拖，點維持治安呀！

成才

邊有佢哋咁蠢至得㗎，拍拖都唔好着住制服吖，制服誘惑咩！

網址：www.sunsiupak.blogspot.com

阿豪觀點：結業禮求婚仲攞膽

警隊又賴嘢，今次輪到單車巡警拍拖必晒恩愛，有人仲要將纏綿私家相簿掟上Facebook添！哈哈，豪伯就曾經見過有人將自己早餐食嘅煎雙蛋放上Facebook，唔知仲以為有咩咁巴閉，唔通係太空人專用嘅食品？

咁都未算笑死人呀，原來除咗恩愛拍拖必外，網上仲流傳另一段警員「疑似結業禮求婚」短片。你知唔知警方點回應？佢哋話喎，有關警員藉結業禮邁向及慶祝人生另一重要里程，爭在未恭賀一對新人白頭到老，永結同心。

咦，問題重點幾時由係咪當緊值，變為係咪人生重要里程㗎？如果咁講，生BB夠係人生重要里程啦，咁拍拖必警員係咪可以……

網友觀點......

lillian_wong

老實講，新一代嘅警察真係好幼稚，咁大個人都唔識諗，有啲嘢可以做但係唔可以畀人知㗎嘛。

周星星

可能仲有其他更激嘅相未公開。

melody_09

其實警察都係人，拍拖更，偶爾影吓相都冇咩問題，不過Post上Facebook就真係蠢囉~

張三瘋

偶然影一張半張相梗冇問題，問題係佢有成輯相，好似行到邊影到邊咁，完全唔似行緊必囉~~

網址：www.lukchiho.blogspot.com