尋日係黑色星期五，偏偏科大就揀喺呢日舉行第三任校長就職禮暨學位頒授儀式。四位社會領袖同世界著名學者獲頒榮譽博士學位，佢哋分別係金管局前總裁任志剛、馬會主席阿John陳祖澤、諾貝爾物理學獎得主崔琦，以及普林斯頓大學榮休教授鄒至莊。
任總離開金管局後，大家都好留意佢嘅動向，佢話仲有半年「冷河期」，如果依家出山打工，就要得到財爺首肯批准，佢笑言：「為免大家難做，好多嘢我都打算唔做住。」咁任總會唔會心郁郁想投身商界呢？佢斬釘截鐵咁話：「商界我就唔係好大興趣，講到尾會畀人覺得有利益衝突……全職加入商界一定唔會。」
轉頭問陳繁昌揀呢日就職會唔會唔吉利㗎？佢笑言自己係科學家，所以唔會迷信，而且佢仲承襲前任校長朱經武「以學生為本」嘅作風，上任第一個禮拜已經同學生會會面，之後仲計劃每個月同學生聚餐一次，務求令師生打成一片。