本文重點
民政事務總署有四百幾名聯絡主任（LO），其員工協會今個月一號起採取工業行動，抗議工作量不斷增加，行動抗爭咗半個月，點知又出現另一火頭。
尋日收到封署名「一群不滿的行政主任」嘅投訴信，信件抬頭係寫畀煲呔曾同公務員事務局局長俞宗怡。信中投訴LO同僚搞工業行動，嚴重影響地區行政工作，無形中將部分工作推晒畀行政主任（EO）等其他職系，令EO無止境咁硬啃額外工作，就嚟谷到爆。
EO投訴縱容LO
封信仲投訴民政事務總署署長陳甘美華「昏庸軟弱」、「擇善而欺」，多年嚟縱容LO，減佢哋嘅工作量，變相欺壓EO，終令LO協會得寸進尺，搞出今次工業行動。封投訴信洋洋灑灑二千字，睇嚟投訴人都谷咗好耐。民政署內部矛盾極深，所謂冰封三尺，非一日之寒，唔通陳甘美華全不知情？
陳甘美華個花名叫「騰雞美華」，兩大職系同時發難，腹背受敵，睇怕佢都有排騰，但依家佢騰雞都冇用，不如盡快同班下屬好好傾吓啦。
民政事務總署發言人話，署方一直平等看待唔同職系，LO採取工業行動後，署方已採取適當措施，減低EO額外工作量，好似容許請行政助理咁。署方仲有意呵番EO同僚，話多謝EO職系喺工業行動期間緊守崗位。