淨係睇攞命陳肯屈就做特首辦主任服侍煲呔曾幾年、連金管局總裁人工減三成都肯去做，就知佢恨做呢個位好耐啦，咁喺立法會初試啼聲，當然想威番次，但最弊係佢未上任已經頭頭碰着黑呢！

首先佢畀上手任志剛「截胡」報喜，喺大氣電波搶先預告咗理應由攞命陳公布嘅外匯基金第三季業績，指基金喺佢管理下三季合共勁賺近千億元；跟住喺香港發售人民幣債券，仲畀政府高層公開話係畀任總嘅退休禮物，兩項金管局重頭嘢都講晒啦！咁攞命陳仲有乜新嘢好講？

講到豪宅創天價，攞命陳早前出招叫銀行收緊按揭，二千萬元以上嘅豪宅只可以批六成按揭。咪以為呢招好使得，事關啲「賓架」同地產商都大潑冷水，話銀行本身就做緊呢樣嘢，仲話啲豪宅多數係外來人買嘅，有啲仲係一筆過「科水」，根本唔使做按揭。換言之，即係話攞命陳發呢招係多餘。

添圖表色彩換湯不換藥

外匯基金、人民幣債券同樓市都冇新進展，攞命陳可講嘅就只有啲舊數字，咁點會有驚喜帶畀財經事務委員會吖！可能攞命陳都自知頭炮未必打得響，所以就要整色整水嘞！

攞命陳尋日向委員會提交咗一份文件，發現同以前有好多唔同，例如用多咗好多圖表，着墨詳細好多，仲用咗好多色彩添！好明顯花過好多心思去包裝，無非係想突出自己同上一手確不同。

之不過，攞命陳咁出力去整色整水包裝自己可能都係徒勞無功，事關份文件啲內容都係冇乜新意，換言之係換湯不換藥，而啲議員係要新料，唔會因為份文件色彩多啲、編排好啲而加印象分畀佢，攞命陳盞嘥心機啦！