唔係啩？施政報告連紓解民困嘅期票都冇張，依家仲攞張明益自己嘅現金支票要納稅人畀錢，當市民係羊牯咩！

煲呔曾份施政報告既「無糖」又無料，齋到唔齋，畀人炳到七彩。港府居然煞有介事提出開一大堆高官職位，即係使大筆公帑請多班人返嚟煲冇米粥，簡直係多餘！

金融海嘯襲港，當局「保就業」嗌咗成年，仲拍心口話會創造幾多萬個就業職位，但通通得個吉，失業率依然高企。打工仔冇啖好食，港府詐睇唔到，加開高官職位就鬼咁積極。明明想開位自肥，又要借落實施政報告嚟過橋，完全係搵市民笨。

有立法會議員質疑當局獅子開大口，當年沙士同財赤打孖嚟，港府請高官都有「一換一」嘅限制。金融海嘯餘波有排都唔走，當局唔檢討現有首長級編制，唔諗吓點節省資源，亦唔增開基層職位減少前線員工壓力，偏偏對開設薪酬高、福利好嘅首長級職位特別鬆手，咁仲唔係自肥？

叮！望吓張開位清單，直頭火都嚟埋。呢嗱，發展局要請一個樹木管理組主管同一個樹木管理辦事處總監，話係要落實綠化建議。香港唔係冧樹砸死人，就係古樹救唔番，係因為管理不善，唔係人手唔夠。請多兩個高官做同一樣嘢，你話係咪多鬼餘吖？

仲有，保安局要加多個政務官，話想加快推行青少年禁毒工作喎。喂，校園驗毒計劃搞到家陣唔湯唔水，係因為各界未有共識當局就匆匆推出，官員做事唔用腦，請多幾隻手手腳腳於事無補。再講，成個保安局咁大，唔通搵個人做禁毒都無？

叮！最搞笑嘅係，煲呔曾喺施政報告話要大力推動「六大產業」，但係港府建議加開嘅首長級職位入面，同六大產業直接有關嘅得一個咁大把，就係創新科技署負責香港檢測和認證局秘書處嘅D2政務官嘞。

諗落認真大鑊，呢次至請一個，港府第日咪大條理由打住「六大產業」塊招牌狂請人？唔係杞人憂天㗎，嗱，港府話到明，最終開設嘅首長級職位可能唔止呢條數，仲有五個部門檢討緊，即係話開設首長級額外職位陸續有來。

叮佢個鎯鎯！如果確有需要，市民唔介意加開首長級職位，至弊施政報告有關發展經濟嘅措施全部都係炒冷飯，港府只不過想趁機開多啲首長級職位益自己。唔該立法會議員(目及)實啲，如果呢個巨無霸政府愈來愈臃腫，納稅人就有難咯。