小白觀點：煲呔曾時薪都低過綜援

香港周街都係窮人，煲呔曾唔係好信有咁嘅一回事，佢重新詮釋乜叫貧窮，原來「收入低過綜援先算係貧窮」。按照呢個定義，煲呔曾同埋三司十二局都算係貧窮喎，佢哋渾渾噩噩磨一個鐘，時薪的而且確低過綜援，公務員團體快啲抄低呢個定義，遲啲又可以嗌加人工，爽呀！話時話，小白老弟搵勻個電話簿，發覺最窮就係自己，其他嘅朋友唔講，淨係講隔籬豪伯吖，佢不知比小弟有錢幾多，見佢有日靜雞雞打開存摺，唔知係夕陽打落佢塊面定係乜吖，總之有陣金光反一反，幾幸福呀真係。同一時間當我打開青BB嘅稅單，一睇之下，當場面都青！算啦，唔講嘞，係時間要出去同婆仔爭紙皮幫補吓，拜拜。

網友觀點...X）...

[　全叔　]

呢個煲呔曾呢，冇政治智慧就唔好出來講嘢啦，慳電膽風波都未過，佢仲同自己加多兩腳，呢啲咪叫做自殺囉！

[　Simon　]

咁嘅說話佢都講得出，香港有幾百萬人，日日做到唔停手都只係搵餐晏食，連租都未必交得起，咁都唔叫窮，叫乜呀？

[　餓鬼　]

可能煲呔曾自細淨係聽過「窮到死」呢三個字，以為真係餓到死鬼咗至叫窮呢。

[　港人治（死）港　]

佢阿x係police，阿y係police，都食得起seafood同在警署內玩女……當然唔知窮為何物啦！！

網址：www.sunsiupak.blogspot.com

阿豪觀點：不如話香港係全民皆富

「點至叫窮」？因阿扁推介一炮而紅嗰本叫《窮得只剩下錢》嘅書，認為一個人就算好有錢但係心靈唔富足，一樣唔好得過嗰啲仙都唔仙吓嘅窮鬼幾多！

咦，咪住先！依家又唔係討論哲學問題喎，現實生活中，幾時見過住板間房捱電風扇嘅人畀人叫富翁呢？其實真正會問「點至叫窮」呢個一字咁淺問題嘅，得煲呔曾一個啫，佢老人家一時又話香港人「想窮都難」？最近又話貧窮嘅定義係嗰啲生活差過攞綜援嘅人士，或者因為貧窮標準太低，所以香港人想窮都難啩？煲呔曾呀，點解你唔索性話一日未餓死，一日都唔叫做貧窮呢？咁計法，香港肯定係世界第一個全民皆富嘅地區啦！

網友觀點...X）...

[　匿名　]

咁多人住籠屋、板間房唔通都唔叫窮？唔通要瞓街先叫窮？

[　死窮鬼　]

如果請煲呔去籠屋住番一個禮拜，相信佢唔會講出啲咁涼薄嘅說話！

[　TT1982　]

煲呔日日畀人吠，又慳電膽，又利益輸送，佢都當聽唔到啦，點會理班窮人。

[　dream_cool　]

幾十人逼埋一間籠屋，連CNN都要報道，咪話唔勁，不過唔係勁叻，係勁醜，政府知唔知醜字點寫！